PSD La Konsistente Iha PN

Partidu Sosial Demokrata (PSD) nu’udar mós membru Aliansa Maioria Parlamentar (AMP) lakonsistente ba sira nia pozisaun polítika iha Parlamentu Nasional (PN).

Tamba iha Segunda-Feira (12/04) Sekretáriu Estado Konselho Ministru (SEKM) Hermenegildo Pereira nu’udar mós Porta Voz IV Governu Konstitusional Aliansa Maioria Parlamentar (AMP) ne’ebé reprezenta Governu liu husi Ministru Negósius Estranjeiru Zacarias Albano da Costa wainhira aprezenta Lei Precedencias Protócolu Estadu maibé PSD walk out (sai husi plenária, red) husi plenária.

Razaun PSD nia halo walk out husi Plenária hanesan aktu polítika kritika ba Sekretariu Estadu Konsellu Ministru Hermenegildo Pereira, tamba tuir lolos lei ne’e Ministru Negosius Estranjeiru (MNE) Zacarias Albano da Costa nia kompeténsia no Ministru Zacarias mak tenki Defende, la’os Sekretariu Estadu Konsellu Ministru Hermenegildo mak aprezenta fali.

Maibé iha plenária Tersa-Feira (13/04) iha diskusaun kontinuasaun ba lei refere membrus bankada PSD marka hikas fali sira nian prezensa iha plenária hodi tuir diskusaun to’o rohan.
Iha aprezentasaun lei ne’e iha Segunda-Feira Vice Preszidenti Parlamentu Nasional Maria Paixão ne’ebé hanesan mós membru Partidu Sosial Demokrata inkliu mós deputadu sira seluk husi bankada Parlamentar PSD nia laran Walk Out husi plenária.

Istória hakerek hela nafatin katak, pozisaun Walk Out husi plenária la’os ona buat foun ba PSD tamba iha Parlamentu Primeiru Lejislatura wainhira iha debate Orsamentu Jerál do Estadu mós bankada PSD no Partidu Demokrátiku (PD) halo walk out bei-beik.

Alende ne’e iha Parlamentu Segundu Lejislatura ne’e mós Partidu bankada Frente Revolusionária Timor Leste Independenti (FRETILIN) iha debate Orsamentu Jeral do Estadu tinan fiskal 2008-2009 mós walk out.