Reprezentante povu iha Uma Fukun Parlamentu Nasionál (PN) Kinta-Feira (15/04) sama atensaun ba Prezidenti Repúblika (Pr) José Manuel Ramos Horta atu labele interfere uluk, fó indultu ba Gastão Salsinha Cs, tamba Tribunal seidauk fó nia resposta ikus.
Prezidenti Bankada Partidu Unidade Nasionál (PUN) ne’ebé asume mós pasta Prezidenti Komisaun A ba asuntu Konstitusionais Justisa Administrasaun Públika Poder Lokal no Lejislasaun do Governu Fernanda Mesquita Borges fó sai deklarasaun ne’e ba Jornalista sira relasiona ho informasaun ne’ebé fó sai katak Prezidenti Repúblika sei fó indultu ba prizioneirus Gastão Salinha ho nia kolega sira.
Gastão Salsinha hetan kastigu tinan 9 fulan 4 kadeia tamba hetan akuzasaun involve directamente iha kazu atakes konvoi Primeiru Ministru Kay Rala Xanana Gusmão husi Balibar mai Dili iha 11 Fevereiru tinan 2008.
Desizaun Tribunal Distrital Dili ne’e hatún iha iha loron 3 fulan Marsu tinan 2010.
Maske nune’e maibé Prezidenti Repúblika oras ne’e dadaun sei hein pareser husi Governu nian.
Deputada Bankada Partidu Unidade Nasionál ne’e afirma katak, nia parte la konkorda desizaun ne’ebé Prezidenti Ramos Horta foti.
“Ha’u la konkorda ho desizaun Prezidenti nia ne’ebé fo indultu ba Salsinha Cs. Ha’u sente Prezindenti hakat liu tiha ona, tamba tuir informasaun ne’ebé ha’u hetan katak Salsinha Cs sira sei rekursu ne’e namanas,”katak Fernanda Borges.
Deputada ne’e konsidera desizaun Prezidenti Repúblika hanesan kompremete ona tribunal atu hasai ema sira ne’e husi kadeia.
“Ha’u hanoin ne’e la lós”,dehan Deputadu Fernanda Borges.
Nia mos husu ba Prezidenti Repúblika José Ramos Hórta hanoin povu presiza justisa atu la’o iha nasaun Timor Leste ne’e. No husu mós ba Bankada sira iha Parlamentu Nasionál taka falta ba sala ne’ebé ema halo krize mosu iha nasaun Timor Leste ne’e.
“Ha’u rona nia (PR Horta) konvida bankadas hotu-hotu atu ba husu opiniaun halo nusa mak atu fó indultu ne’e ba Salsinha ho nia grupo. Ha’u husu bankada sira ne’e labele taka falta hotu ba sala ne’ebé se-se deit mak halo atu krize ne’e mosu iha rai laran ne’e asumi mós responsabilidade balun, se la’e nasaun ne’e akontese tiha ona bele akontese i se mak halo?, buat sira ne’e politikus sira,”dehan deputada PUN.
Lider Bankada PUN ne’e hateten katak, agora Salsinha Cs sira tama ona iha kadeia politikus sira hakarak hasai para loron seluk bele haruka fali ka?, Ne’e mak sira hakarak, maibé tuir loloos situasaun sira hanesan ne’e labele akontese.
“Ha’u husu barak para ita hanoin nasaun ne’e nia futuru, tamba futuru ho desizoens sira hanesna ne’e sei ladiak ba ita. Ita labele uza lei ne’e atu falun lia lós. Konstituisaun dehan Prezidenti Repúblika bele fó indultu, maibé tribunal nia desizaun seidauk foti,”katak nia.
Nia mós esklarese Prezidenti Repúblika fó indultu ba ema só bele kuandu tribunal foti ona desizaun loloos. Tribunal rekursu seidauk foti desizaun ne’e, husik ba tribunal halo nia servisu mós tuir loloos ema halo sala nia tenki kumpri lai tinan balu hodi bele emenda nia sala ne’e hodi bele selu nia sala.
“Sé tribunal haree sira halo sala, viola lei tenki simu, tamba sa mak Prezidenti hakarak sira sai husi kadeia? Iha buat ruma ho ne’e,”deputada Fernanda Borges kestiona.
Deputada ne’e dehan katak, sé nia vítima duni maibé nia reprezenta órgaun do Estadu ida labele personsabiliza. I ida ne’e nunka bele akontese, sé la’e tenik Fernanda Borges, nia la iha hanoin ba nasaun ne’e nia nesesidade ba futuru.
“La’os ohin deit ita tenki moris iha rai ne’e hanesan ema humanu iha direitus humanus iha nesesidade iha sistema judisiáriu atu funsional halo didiak, sé Prezidenti mak harahun buat sira ne’e hotu aban bainrua saida mak atu akontese iha ita nia rai, tamba ida ne’e mak ami la simu,”tenik Fernanda Borges.
Tidak ada komentar:
Posting Komentar