Polítika Deve

Sei Fó Tusan Ba Povu Iha Futuru
Organizasoens nasionais, internasionais no estudantes universitáriu sira liu husi sivil estudantes liu husi semináriu Kinta-Feira (15/04) hato’o sira nia preokupasaun no krítikas maka’as ba Governu konaba polítika Governu atu deve osan husi rai liur. Tamba konsidera polítika deve osan ne’e sei la fó benefísiu adekuada ba povu, maibé sei husik hela deit tusan ba povu iha futuru.

Preokupasaun, krítikas no ezijénsia ne’e hato’o wainhira partisipa semináriu loron ida ne’ebé organiza husi Organizasaun Não Govermental (ONG) La’o Hamutuk iha salaun Auditoria Liceu Univercidade Nacional Timor Lorosa’e (UNTL) ne’ebé partisipa husi Prezidenti Konsellu Konsultivu Fundo Petrolífero (KKFP) Francisco de Vasconselhos, Formal Staff Juvile USA Network East Timor Kristin Sundel, reprezentante Governu Konselleiru Ministériu Finansas José Abel, estudantes UNTL, média no mós Organizasaun Não Governamentais balun ne’ebé mak durante ne’e luta ba justisa ekonomia iha rai laran.

“Deve dala barak halo gastu Estadu nian iha tinan-tinan aumenta boot, maibé barak mak lori hodi selu tusan iha rai liur, entaun montante orsamentu ne’ebé aprova iha Parlamentu Nasionál atu finansia Dezenvolvimentu seitór públiku rai laran nian menus”,afirma Juvinal Dias Peskizador Organizasaun Não Govermental (ONG) La’o Hamutuk.

Juvinal Dias koalia katak, maske lei Orsamentu Jerál do Estadu no Jestaun finanseiru no aprosimasaun diplomátiku balun ne’ebé sei hadalan TL ba deve, maibé lei Lei fundu minarai artigu 20, la fó dalan hodi uza riku soin fundu minarai hanesan garantia ba deve.

“Maibé laiha infórmasaun ne’ebé ofisialmente ba públiku husi Governu, sobre planu impréstimu nian entaun susa ba ita atu hatene objetivu no razaun fundamental Governu atu deve”,Juvinal Dias hateten.

Ho ida ne’e tuir Juvinal Dias, nasaun kreditór sira sei ba foti obrigamente, osan husi fundu minarai nian hodi selu ba TL nia deve, karik la konsege selu ho fontes orsamentu seluk.

“Deve hanesan sistema neo-kolonialismu ba nasaun terseiru mundu, tamba nasaun ne’ebé iha tusan boot no barak sei labele fó asisténsia sosiál ba nia povu, osan husi riku soin rai laran nian tuir loloos tenke uza ba dezenvolvimentu rai laran, maibé tamba deve, entaun tenke suli maka’as tinan-tinan ba rai liur”,Juvinal Dias argumenta.

Juvinal Dias dehan tan katak, TL hanesan nasaun ida ne’ebé depende maka’as ba minarai iha mundu no nia rekursu rasik limitadu liu, loloos reseitas minarai ida ne’e labele sura hanesan rendimentu ba nasaun.

Tuir Juvinal Dias sé karik TL hahú ona deve husi nasaun seluk ka instituisaun finanseiru ruma, ba futuru ita lahatene, oinsa TL bele fó fila fali tusan hirak ne’e iha futuru.
Tamba tuir ONG La’o Hamutuk ne’ebé luta ba Ekonomia sosial ne’e nia haree katak, besik 98% rendimentu ekonomia TL nian mai husi petroleum, aktualmente kampu Bayu Undan mak fó reseitas ba TL, maibé kampu ne’e rasik nia produsaun sei menus tinan-tinan no nia prediksaun sei maran iha tinan 2023.

Juvinal Dias mós kestiona katak, Governu laiha disiplina fiskal ba nia orsamentu Estadu rasik, hanesan iha tinan 2009 no tinan 2010 Governu fóti osan liu kalkulasaun nivel sustentavel 3% ne’ebé lei fundu petroleum haruka.

Iha fatin hanesan Koordenador Konsellu Konsultivu Fundu Petrolífero (KKFP) Francisco Maria de Vasconselhos esklarese katak, razaun saida mak TL atu deve, Governu presiza aprezenta ba povu atu hatene oinsa deve no atu halo saida mak Governu deve.

Tuir Francisco de Vasconselhos, wainhira Governu deve nia impaktu sai boot liu enkunatu TL labele selu, ou selu tarde. Tamba esperénsia nasaun barak hatudu katak, nasaun nia ekonomia ne’e sai monok tamba laiha planu ne’ebé diak ba deve, lori risku negativu mak povu sei lori todan.

“Tuir ami nia hanoin, sé kapital dezenvolvimentu ne’e mak ki’ik entaun kapital dezenvolvimentu ne’e tenke hasa’e no hamenus gastus ne’ebé mak makina Governu ne’e halo, hanesan iha parte edukasaun, Saúde, nia alokasaun ne’e tun, agora ida ne’e mós seidauk atende, agora Governu halo tan imprestimu ida ne’e atu halo saida”,nia komenta.

Kordenador KKFP ne’e salienta katak, TL laiha razaun atu deve, tamba TL rasik iha nia osan rasik ne’ebé bele uza.

“Ninia dezvantajen mak wainhira Governu jere osan ladiak nasaun ne’e kiak ba bei-beik, hatún pelayanan públiku, entaun TL nia responsavilidade ne’e aumenta boot ba bei-beik”,nia dehan.
Kristin Sundel Formal Staff Juvile USA Network East Timor Leste hateten katak, wainhira TL deve, TL bele hetan independensia polítika, maibé nia bele lakon nia independesia, ekonomia.

Ne’eduni nasaun simu deve povu mak tenke selu, entaun ikus liu laiha osan atu tau ba prioridade sira seluk.

Tuir Kristin Sundel ezemplu iha nasaun barak ne’ebé mak deve oras ne’e dadaun sei moris iha susar nia laran no tinan-tinan depende deit osan deve husi nasaun sira ne’ebé fó deve.

“Exemplu iha nasaun barak mak akontese wainhira Governu halo deve, nasaun ne’e sempre iha krize ekonomia tamba deve”,nia informa.

Iha parte sorin konsellu Ministériu Finansas José Abel hateten katak, polítika Governu konaba deve sei iha faze preliminária maibé seidauk bele implementa tamba Governu mós sei buka meius oinsa atu bele foti desizaun ne’ebé adekuada.

Maske iha informasaun ne’ebé mosu iha públiku katak Governu Timor Leste asina ona nota de intendimentu ho nasaun Portugal no Xiña atu fó deve maibé tuir Konsellu Ministériu Finansas José Abel sei lori prosesu ne’ebé naruk no seidauk iha desizaun husi Governu atu deve ou lae.