Polítika Deve Osan

ONG La’o Hamutuk Eziji Governu Esplika Ba Povu

Organizasaun Não Govermental (ONG) La’o Hamutuk Kuarta-Feira (14/-4), eziji Governu atu esplika konaba impaktu polítika deve osan ba povu tamba povu iha direitu atu hatene.

Pesquizador ONG La’o Hamutuk Juvinal Dias Pinto ba Jornal Nacional Diário iha nia kna’ar fatin hateten katak, TL iha dependete ba minarai, besik 98% no ekonomia TL mai husi minarai.

Tamba ne’e dehan Juvinal Pinto nu’udar sosiedade sivil ne’ebé mak durante ne’e luta ba ekonomia sosial no Justisa tauk ho polítika deve osan ne’ebé Governu adopta.

“Ha’u tauk sé karik ita ba imprestimu depois osan ne’e labele sirkula iha TL, to’o ita nia fundu minarai ne’e hotu, ita laiha ona buat seluk ita atu halo, tamba ne’e Governu tenke halo justifikasaun konaba imprestimus ou deve”,Juvinal hateten.

Ho ida ne’e Juvinal Pinto hatutan, La’o Hamutuk sei kria audiensia públika ba komunidade atu halo diskusaun konaba asuntu ne’e.

“Aban (Kinta, red) ami sei halo enkontru públiku ida ho nia objetivu, oinsa povu Timor Leste bele hatene saida mak impaktu husi emprestimu ba futuru jerasaun nian, tamba durante iha tinan 2009 Governu halo tiha ona aprosimasaun diplomátiku lejislasaun balun no koalia mós lei orsamentu jestaun finanseiru”,hateten Juvinal Pinto.

Juvinal Pinto informa katak, Lei fundu minarai artigu 20 hateten katak, labele uza fundu minarai hanesan deve, tamba ne’e wainhira Governu atu halo impresta husi nasaun sira seluk, Governu tenke esplika oinsa bele selu fila fali deve ida ne’e, no osan atu selu tusan ne’e mai husi ne’ebé, tamba fundu minarai automátikamente labele.

Tamba ne’e ONG La’o Hamutuk ne’ebé luta ba ekonomia sosial ne’e husu ba Governu atu justifika klaru, katak osan ne’ebé deve ne’e atu halo saida iha nasaun ida ne’e.

“Sé karik ita nia Bayu Undang ne’ebé fó hela produsaun mai ita ne’e mak maran iha tinan 2023, entaun iha tinan ne’e oinsa TL bele hetan osan husi ne’ebé mak atu selu fila fali deve ne’e, tamba ita nia riku soin hotu ona, tamba nasaun ne’e harii tinan atus ba atus ona, keta halo ba jerasaun ikus mai sai vítima ba deve sira ne’e”,nia dúvida.

Tamba ne’e Juvinal Pinto hateten katak, razaun fundamental Estadu ne’ebé hodi halo imprestimu, entaun Governu tenke esplika ba povu katak, osan ne’ebé impresta ne’e ba investimentu ou uza ba gastus.

Tuir Juvinal Pinto, nasaun ne’e sei falla liu, wainhira Governu ne’e laiha disiplina fiskal.
“Hanesan Projectu Pakote Referendum (PPR), laiha proposta orsamental, tamba ne’e ami tauk hela sé karik Nasaun ne’e halo impresta, depois fó benefísiu deit ba elites. Ha’u hanoin Governu tenke esplika”,nia informa.

Juvinal Pinto informa katak, imprestimus ne’e iha nasaun barak nunka fó benefísiu, tamba osan ne’ebé impresta ne’e la sirkula iha TL ou la ba ekonomia povu nian, maibé ba sirkula iha nasaun ne’ebé fó deve, entaun TL nafatin iha krize finansial.

“Tamba ne’e ami haree ba problema hirak ne’e Governu tenke halo justifikasaun, tamba automátikamente deve sei fó impaktu ba nasaun ida ne’e iha futuru, sé ita deve osan husi rai liur i obrigasaun ba TL atu selu deve hirak ne’e, wainhira ita la selu, ita iha fundu minarai maske labele garantia, maibé sira iha poder no iha obrigasaun ba foti osan imidiatamente”,nia esplika.