MNE Zacarias Akuza Média Autór,

Riak Leman: “Ne’e Sala, Presiza Hadia”

Ministru Negosius Estranjeirus (MNE) Zacarias Albano da Costa, ne’ebé akuza médeia nasinal Timor Leste mak sai autór ba ninia kazu no manipula informasaun ba públiku, Xefi Bankada Partidu Sosial Demokrata (PSD) Riak Leman konsidera deklarasaun ne’e sala, tamba ne’e husu Minstru Zacarias tenke hadia nia lia fuan.

MNE Zacarias akuza média, tamba média mak fó sai informasaun konaba nia rejinasaun ne’e ba públiku, no públika nia Short Mesangen Servise (SMS) ne’ebá nia manda ba asesor Primeiru Ministru (PM) Kay Rala Xanana Gusmão.

Xefi Bankada PSD Riak Leman hato’o kestaun ne’e ba Jornalista sira Kuarta-Feira (14/4) iha Parlamentu Nasionál (PN),hafoin partisipa seremonia tomada depose ba Provedoria dos Direitos Humanus no Justisa (PDHJ).

Xefi bankada PSD ne’e salienta tan katak, akuzasaun ne’ebé Ministru Zacarias halo ba média sira ne’e lalós no presiza hadia, tamba nu’udar Ministru tenki hatudu ezemplu diak i labele akuza média sein faktus.

“MNE Zacarias du’un média mak autór ne’e la lós. Sé hanesan ne’e irmão Zacarias mak koalia ida ne’e, no liberdade imprensa iha duni, ha’u hanoin irmão Zacarias koalia ne’e keta sala karik,”presiza hadia,”Riak Leman afirma.

Riak Leman informa katak, média iha direitu atu fó sai problema iha Governu Aliansa Maioria Parlamenta (AMP) ka iha Governu seluk hanesan mós iha parlamentu.

Nia parte hanoin problema ne’ebé akontese iha Governu AMP nia laran ne’e hetan rezolve no la iha tan problema entre membru Governu ho Xefi Governu. Nune’e husu ba Governu AMP tenke servisu nafatin.
“Ha’u hanoin la iha problema ida, mas loloos problema ne’e ha’u sentidu loloos mak rezolve tiha ona i la iha tan problema Governu AMP la’o nafatin, servisu nafatin ba ita nia povu ne’ebé iha nia rai ida ne’e,”hateten Riak Leman.

Xefi Bankada PSD nu’udar mós eis veteranus ne’e salienta katak, tuir Lei média ne’e imparsial, independenti, tamba ne’e nia instituisaun iha nasaun Timor Leste nia laran tomak tenki ajuda atu ne’e média bele la’o ba oin.

“Ha’u hanoin instituisaun hotu-hotu tenki ajuda média ne’e para sai profesional diak liu tan,”katak nia.

Iha parte seluk Deputadu husi bankada Conselho Nacional da Reconstrusaun Timor Leste (CNRT), Aderito Hugo da Costa hateten katak, média iha direitu atu halo publikasaun sa tan ba kargu públiku hanesan Ministru.

“Ita des-esperadu tiha ona ne’e mak ita komesa dun ema arbiru ona,”katak Aderito Hugo.
Iha sorin seluk Xefi Bankada Parlamentar Frente Revolusionária Timor Leste Independenti (FRETILIN) Aniceto Guterres afirma katak, jornalista sira ne’e hanesan sé hela gravador ba mak koalia mak sai iha nutísia, ne’ebé atu dehan ba média mak bosok mós ladiak.

Nia mós hanoin katak Ministru Zacarias agora sei desesperadu hela ne’ebé bele kompriende nia situasaun.

“Ha’u dehan ba ita bo’ot sira média lalika tauk, tamba ne’e hanesan gertak sampal ida atu despaisa deit média tamba nia desesperadu hela imi publika tan informasaun hirak ne’e nia situasaun ne’e difisil hela,”katak Xefi Bankada FRETILIN.

Nune’e mós Xefi Bankada Partidu Unidade Nasional (PUN) Fernanda Mesquita Borges hateten katak, kazu Minstru Zacarias ne’ebé du’un fali ba média dehan katak média mak autór ne’e loloos labele halo ida ne’e, tamba ida ne’e média nia servisu.

“Ha’u husu média kontinua halo, atu se-se deit informasaun diak ka aat fó sai ba ema ne’e depois esplika rezolve agora diak malu, fó sai para povu hodi hatene, tamba sira la’os ukun sira nia-an, mas ukun nasaun. I media pilar implementar ida demokrásia ninia atu fó informasaun ba públiku,” katak Xefi Bankada PUN.

Nia salienta liu tan katak sé Governu monu, entaun monu deit ba, maibé média tenki fó sai para públiku bele hatene saida mak akontese iha Governu nia laran.

“Média tenki fó sai, iha papél média nian la iha ema ida atu trava, média fó sai para povu bele hatene para média bele preparadu i povu mós bele analiza tamba sira la’os ukun nia maibé sira ukun ba nasaun,”tenik Fernanda Borges.