Xanana: FSI Tenke Sai

DILI—Primeiru Ministru (PM), Kay Rala Xanana Gusmão repeta tan katak Forsa Stabilidade Internasional (FSI) husi Austrália tenke sai husi Timor Leste iha tinan 2012 .

Xanana hato’o kestaun ne’e ba jornalista sira iha Aeruportu Comoro, foin lalais ne’e, relasiona ho deklarasaun Jeneral Forsa Armada Austrália, David Hurley kona-ba posibilidade atu hanaruk misaun Austrália iha Timor tamba Timor Leste sei hasoru tinan ne’ebé mak krítiku iha iha eleisaun prezidensiál no lejislativa ne’ebé maka sei hala’o iha tinan 2012.

Xanana haktuir, antes ne’e nia retiru ona ho Prezidenti Repúblika José Ramos Horta katak depois eleisaun remata FSI bele fila ona.

“Ha’u ko’alia ho prezidenti repúblika antes iha Marsu katak depois 2012, sira (FSI) bele fila ona. Sira hela tanba eleisoens. Ne’eduni, ha’u halo apelu ida ba povu tomak katak ita komporta-an diak, ita hatene moris domin ho dame, ita la presiza bolu ema husi liur mai, mai la’o hela de’it kaer kilat tun sa’e maibé la halo buat ida. Gasta sidadania Australiana sira nia osan liu husi impostu ne’ebé selu ba governu Austrália,” nia realsa.

PM Xanana haktuir, komunidade internasional hakarek karta protesta ba xefe governu katak forsa Australiano tama arbiru de’it iha fatin ne’ebé lulik.

“Ha’u simu karta protesta husi komunidade interior ne’eba hakerek bei-beik surat mai ha’u, protesta tanba forsa Australianu tama arbiru de’it iha fatin ne’ebé ita dehan lulik, tama sai helikoptru ba halo karau halai arbiru monu mate, ita mak selu hotu fila fali, ne’ebé atu dehan karik katak posisaun politiku husi governu nian dehan, lae, eleisaun hotu tiha fila, buat ida koperasaun oin seluk, mas buat ida hela ita la presiza,” nia hatutan.

Niai informa polítika estratéjiku Australianu nian maka Ministru Defeza Australianu hatete sei ko’alia ho Prezidenti Estadus Unidus Amerika, Barrack Obama ne’ebé maka sei ba vizita Austrália iha fulan Novembro mai hodi reforsa forsa Amerika iha tasi Timor no sei reforsa prezensa Amerikana iha Darwin.

“Ne’ebé, sira (Austrália) presiza sira nia kontijensia (forsa) ne’ebé iha Timor. Sira haruka kontijensia mai Timor Leste husu fali Amerikana atu ba reforsa iha ne’ebá. Ne’e ita dehan laiha lójika,” Xanana haklaken.

Maibé, xefe governu Timor Leste mós la haluha fo agredese ba ajudu ne’ebé maka FSI apoiu ona ba nasaun Timor Leste atravez krizi bo’ot ida iha 2006 no antentadu 11 fevereiro 2008, ajuda rezolve problema artemarsiais baku malu no sunu.

Aleinde ne’e, Xanana mós kongratula loron Nasoens Unidas ne’ebé monu iha Segunda (23/10) ohin.