Partidu PDN ‘Ilegal’ Tama Suku Kaikoli

DILI- Xefé Suku Kaikoli, Dili, Impolito Marques konsidera prezensa edifisiu Partidu Dezenvolvimentu Nasionál (PDN) iha Kaikoli, ilegal. Tanba, la fó hatene ba autoridade lokal.

Maibé, Cancio Pereira, Prezidente Konsellu Nasional PDN deklara, estrutura partidu respeita autoridade lokal Suku Kaikoli no lakleur tan, sei halo enkontru atu fó koñesimentu. Partidu PDN rejistu tiha ona iha Tribunal no hetan ona Legalizasaun husi Tribunal Rekursu.

“PDN mai iha ha’u-nia Suku Kaikoli ne’e, ha’u bele dehan nia ilegal. Tamba partidu ne’e harii edifisiu iha ne’e, sein koñesimentu ba ami, nudar autiridade lokal iha suku ne’e,” Xefé Suku Kaikoli, Ipolito Marques Sarmento deklara iha Sede Suku Caicoli.

Xefé Suku rekoñese hato’o ona problema ne’e ba Ministra Justisa, Lucia Lobato. “Ha’u ko’alia ona ho Ministra, konfirma despaxu Ministra nia tun ona. Maibé PDN tenki halo iha fatin seluk, la’os foti fali eis uma Indonezia, ne’ebé husik hela ne’e,” Ipolito dehan.

Prezidente Konsellu Nasionál PDN, Cansio Pereira bainhira konfirma kona-ba asuntu ne’e, Sesta (13/5) kalan esplika, PDN hetan ona autorizasaun husi Ministra Justisa iha Ourtubru 2010, atu uza parte sorin husi eis Kantor Kehutanan (STAE nia oin), hodi harii edisifiu partidu.

Alemde PDN, partidu ASDT no UNMIT mós koko ayu uza fatin ne’e. “ Maibé Ministru Justisa hatun despaxu ba PDN,” Cansio dehan.

“ Maibé ami seidauk halo renovasaun iha fatin ne’e, tanba se ativu halo konsolidasaun iha distritu sira. Ami foin ma tau hela kalen balun, atu satan netik fatin ne’e,” nia informa.

Nia promete, Diresaun nasional partidu PDN sei hasoru malu ho Xefé Suku Kaikoli no nia Konsellu de Suku sira, atu informa kona-na fatin ne’e. “ Ami konsidera nafatin autoridade lokal sira. Tamba ne’e ami sei hasoru malu, bainhira atu hahú ona renovasaun edefisiu,” nia dehan tan.

Parpol iha direitu

Deputadu Komisaun A ne’ebé trata asuntu konstituisaun, justisa administrasaun publika, poder lokal no Legislasaun Governu nian, Natalino dos Santos hatete, partidu politiku iha direitu atu hetan fasilidade governu. Tanba partidu no organizasaun barak, hetan fasilidade governu. “ Se Minsitra Justisa autoriza, sira bele uza fatin ne’e. Ne’e kompetensia Ministra atu deside,” Natalino hateten.

Opiniaun hanesan mós mai husi deputadu Domingos Sarmentu. “Tuir lei Bens juridiku Bens moves no propriedade, ne’ebé Estadu nian, bainhira okupante ida okupa, tenki husu autorizasaun husi Ministeriu Justisa.”.

Nia dehan, koñesimentu ba Xefé Suku ne’e normal, tanba hanesan autoridade lokal ne’ebé kaer poder lokal. “ Maibé la’os husu lisensa. Tamba iha lei, Ministeriu Justisa mak bele autoriza no fó lisensa ba ema, atu okupa rai ne’ebé deit,” dehan Domingos.

Nia mós kritika Xefé Suku balun, ne’ebé uza sala fali poder, hodi fó arbiru rai ka fatin ba ema hodi hela, no balu mós bele fa’an fali rai.