PM Xanana Ameasa Rezigna An

Aniceto: “Afeta Estabilidade Politika”
Primeiru Ministru (PM) Xanana Gusmão ameasa rezigna’an se bainhira Parlamentu Nasional (PN) lakonkorda ho planu estratejiku desenvolvimentu nasional (PEDN) oras ne’e nia rasik hala’o hela konsultasaun haleu Sub-distritu 65. Xefi bankada parlamentar FRETILIN, Aniceto Guterres konsidera atetude rezigna’an bele afeta ba estabilidade politika rai laran.
“La’os FRETILIN mak hatun, se planu estrategiku mai iha parlamentu mak se FRETILIN la konkorda karik ne’e buat seluk. Governu ne’e la presiza hatun nai monu deit, mas se monu ona ne’e FRETILIN preokupa tamba Governu ida monu iha dalan klaran ne’e la diak ba estabilidade politika” hateten Aniceto Guterres iha Parlamentu Nasionál.

Nia hatutan katak, kuandu Governu de faktu ka la’os defaktu monu iha dalan klaran ne’e la diak, bele kria presedente ladiak liu-liu ba Timor ne’ebé fóin hari’i, tamba nasaun fóun presiza estabilidade politika Governu liu husi eleisaun i hakara Governu ida pelimenus tinan lima para atu bele hala’o nia programa.

Nia salienta katak, se programa Governu nia mak la pasa ne’e mak iha implikasaun ba rezignasaun ho Governu ninia, hanesan orsamentu mak dala rua lapasa. Nune’e mos PEDN dehan planu nasional la’os planu partidu ida ka ema ida nian.

Tamba ne’e ne’e planu nasional ninian ne’e mai iha parlamentu para atu hetan apoiu politiku atu hetan apresiasaun deit la’os dehan aprova ka la aprova.
Iha sorin seluk husi bankada parlamentar CNRT Arão Noé de Jesus hateten katak, Timor Leste ne’ebé fóin ukun an presiza iha planu para sai hanesan linha jeral, ne’ebé hatudu saida mak atu hala’o ba tinan 20 oin mai, tamba ne’e planu ne’e imprortante no inisiativu diak ne’ebé PM Xanana halo ba konsulta i duvulga planu ne’e ba povu sira iha baze.

Maibe deputadu partidu Congresu Nacional Reconstrução Timor Leste (CNRT) ne’e hare husi parte bloku Aliança Maioria Parlamentar (AMP) ne’ebé iha, planu estrateziku sei aprova iha plenaria, wainhira PM Xanana Aprezenta iha parlamentu.

“Ha’u hare husi AMP ne’ebé iha, ha’u fiar katak planu estrateziku ne’e sei aprova iha plenaria ne’e wainhira PM xanana lori mai iha parlamentu husu aprovasaun ne’e sei aprova 100%,” katak Arão.

Nune’e mos deputada husi bankada parlamentar Partidu Demokrátiku (PD) Teresa Maria de Carvalho hateten katak, planu estrateziku importante, hanesan membru AMP husi PD fó nafatin apoiu ba PM Xanana atu bele hala’o planu ho konsultasaun ne’ebé diak i lori ba parlamentu no fiak katak PM Xanana sei larezigna’an i planu estrateziku ne’ebé halo konsultasaun iha baze, wainira lori ba Parlamentu sei aprova.

“Iha planu ne’e buat ruma presiza hadia, ne’e Ha’u hanoin PM Xanana simu atu hadia, mas la liu ne’e, karik la los, tamba ema hotu hein hela planu estrateziku ne’e. se planu estrateziku ne’e mai mak la diak, ami AMP maioria para fó apoiu ba PM Xanana,”tenik Teresa.

Aleinde ne’e deputadu husi banakada parlamentar Assosiação Sosial Demokrátika de Timorense (ASDT), Domingos da Costa dehan katak wainhira planu estrateziku ne’ebé PM Xanana rasik halo konsultasaun haleu Sub-distritu ne’ebé mak lori ba parlamentu sei hare mak fóin dehan apoiu ka la apoiu.
“Ami hein deit wainhira mai hasoru ami mak ami hare planu ne’e diak mak fóin fó apoiu se ladiak ami la fó apoiu,” katak Domoingos.