Halo Violasaun Sexual,

Estudante Timoroan Ida Tama Prizaun Denpasar
Estudante Timoroan Salvador da Costa ne’ebe estuda iha nasaun Indonesia tama prizaun Denpasar Bali, Indonesia, tamba halo abuzu sexual ba labirik ho idade 12 anos iha Idonesia.

Informasaun ne’ebé deputada Virgínia Ana Belo foti iha plenária estra ordinária, relasiona ho informasaun ne’ebé fo sai foin lalais ne’e iha Metro TV Indonesia.

“Iha filmajen ne’ebé fo sai ne’e la’os dun deit, maibé polisia Indonesia kaer tiha nian borgol tiha nia i no fó hatais nia “tahanan Denpasar”, prizioneiru Denpasar, Bali, Indonesia”,deputada Virgínia afirma ho matan nabilan.

Maske nune’e maibé deputada Virgínia rasik mós la esplika detallu konaba kronolojia akontesimentu violasaun sexual, data no fatin inklui mós data públikasaun iha Metro TV Indonesia.

Maibé deputada ne’e hateten deit katak, iha filmajen ne’e nia dituduh halo abuzu sexual ba labarik ho minoridade.

“Ne’e foin ida, maibé sira mós deskonfia Salvador katak antes ne’e iha ona keixa husi inan aman balun ne’ebe hateten katak sira nia oan balu hetan abuzu sexual.

“Sira bele kondena nia ba akontesimentu antes nian, ha’u hakarak Estadu foti lalais pozisaun ida katak ita labele haruka nia mai iha Timor,” katak deputadaVirgínia.

Deputada ne’e mós husu ba estadu Timor Leste tenke buka advogadu diak iha Indonesia para bele akompaiña prosesu estudante Timoroan ne’e para bele halo prosesu julgamentu ba oin.

“Ita labele husik tamba ida ne’e estadu nia dever i estadu mak tenki selu advogadu ne’e,”tenik Nia.

Iha sorin seluk Sekretária Komisaun A Parlamentu Nasionál ne’ebe trata ba asuntu Konstitusionais, Justisa, Administrasaun Públiku, Poder Lokal i Lejitimasaun do Governu Carmelita Caetano Moniz hateten katak, nia parte triste tebes wainhira nia rona estudante Timoroan halo violasaun sexual ho labarik menoridade iha Indonesia.

“Ita triste estudante Timoroan ida atu ba estuda para sai matenek tamba sira mak futuru nasaun ida ne’e nian. Mas tanba saida mak nia tenki ba komete fali krime iha ema nia rai,”dehan Carmelita Moniz.

Sé nia komete krime iha nasaun ne’ebé deit, lei nasaun ne’e mak aplika ba nia, sé nia halo duni violénsia sexual iha Indonesia entaun lei Indonesia mak aplika ba nia i sira tenki halo prosesu tuir lei Indonesia nian.

Timor Leste tenki haree ne’e sidadaun Timor nian, tamba ne’e Carmelita husu liu husi konsoladu Timor Leste iha Bali, Denpasar para akompaiña prosesu justisa iha Indonesia i desizaun ne’ebé tribunal hato’o justu duni tuir dalan justisa ka lae.

“Ita labele husu ita nia estadu ba halo intervensaun tamba ne’e ita halo krime iha ema nia rain, entaun ema nia lei mak sei aplika, hanesan sidadaun seluk ida mak mai komete krime iha ita nia rai ne’e ita nia lei mak aplika ba ema,”dehan Carmelita Moniz.

Nune’e mos Vice komisaun F Parlamentu Nasionál ne’ebé trata ba asuntu Saude, Edukasaun i Kultura, Francisco Jerónimo hateten nia la fó komentáriu (no comment), tamba hahalok ne’e hatun nasaun nia naran.

“Ha’u no comment, tamba ida ne’e hatun nasaun nia naran no hahalok ne’e krime sé akontese duni,” tenik Francisco Jerónimo.