Sekretariu Jerál (Sekjer) Partidu Congresso Nacional de Reconstrução de Timor Leste (CNRT) Dionisio Babo hateten katak, Partidu CNRT fó apoiu tomak ba Governu atu dada pipeline husi Greater Sunrise (GS) mai Timor Leste (TL).
Dionisio Babo deklara, Partidu CNRT fó fiar no apoiu tomak ba IV Governu Konstitusional ne’ebé lidera husi Primeiru Ministru (PM) kay Rala Xanana Gusmão hodi defende povu Timor Leste nia interese dada kadoras (pipline) husi Greater Sunrise mai Timor Leste.
“Partidu CNRT fó fiar ba maun bo’ot Kay Rala Xanana Gusmão nu’udar Primeiru Ministru no lider luta ba libertasaun nasional hodi bele lidera fila fali luta ba dada pipeline ka kadoras Greater Sunrise mai Timor Leste,” hatete Dionisio Babo.
Dionisio Babo hatutan katak, Timor Leste iha direitu tomak atu dada pipeline Greater Sunrise mai Timor Leste, tamba Bayu Undang ba ona Australia ne’e mak justu.
“Ba CNRT Timor Leste iha direitu tomak atu hetan pipeline Greater Sunrise tamba pipeline ida seluk, Bayu Undang, ba tiha ona Asutralia. Ida ne’e mak Justu, no ida ne’e mak prinsipiu ekuitativa. Ami apoiu makas governu hodi labele hakruk ba kompaiña Woodside, tamba buat ida riku soin petróleo ne’e povu nian, so governu ne’ebé reprezenta Estadu TL mak bele deside la’os kompañia mak deside fali,” katak Deonisio.
Nia salienta, kompaiña Woodside tenki respeita Governu Timor Leste liu husi Autoridade Nacional de Petróleo hodi diskuti sobre planu saida deit, maibé la’os halo mesak-mesak (sepihak) depois hakarak impoen fali no la respeita Estadu soberanu Timor Leste.
Desizaun Woodside ne’ebé hateten katak, sira hili liu Floating LNG (LNG namlele) iha tasi laran. Ne’e hatudu deit arongánsia husi kompañia ne’e, maibé realidade to’o ikus governu mak sei tesi lia ikus.
Husi sorin seluk Governu Timor Leste desmente (hamout tiha) proposta kompaña Wooside konaba Floating LNG atu namlele iha tasi laran ou dada ba Darwin (Australia).
“Timor-Leste (TL) besik liu tan atu manan pipeline mai Timor-Leste-dismente (hamout tiha) proposta Woodside konaba Floating LNG/LNG namlele iha tasi laran”, hateten Alfredo Pires foin lalais ne’e iha Dili.
Tuir Alfredo Pires, ba Timor-Leste pipeline husi Greater Sunrise tenki mai iha Timor-Leste, tamba pipeline Bayu Undan ba tiha ona Australia, entaun so justu deit kuandu pipeline ida seluk mai Timor-Leste.
“Proposta Woodside konaba atu halo LNG namlele tasi laran ne’e, ita sei la simu no la aprova”, nia informa.
Alfredo Pires hateten katak, Timor-Leste hakarak mak pipeline mai iha TL, tamba teknikamente viavel no komersialmente mos diak. Buat ida LNG namlele iha tasi laran (floating LNG) ne’e ladiak ba Timor tamba la fo benefisiu maximu ba Timor hanesan kampu traballu, industria sekundaria, no oportunidade bisnis ba Timor oan sira. Nune’e mos Floating LNG/ LNG namlele iha tasi laran ne’e teknolojia foun nebe seidauk prove iha fatin ida iha mundu no iha risku siklon no seluk tan.
“Ne’e razoens teknikas ita la aseita LNG namlele. Maibé importante liu, mak ne’e Governu Timor-Leste iha ne’e atu defende povu Timor-Leste nia direitu. Hau Sekretariu de Estadu Timor-Leste, hau defende interese Timor-Leste laos kompania ka nasaun seluk”, nia defende.
Iha parte seluk Director Organizasaun Não Govermental (ONG) Luta Hamutuk Mericio Akara afirma katak, Governu la komprende prosesu kontratu, tamba Greater Sunrice ne’e quintal Australia no Timor Leste nian.
“Área konjuntu ne’e ita labele hanesan fali ita nia to’os mak ita deside, tamba ne’e la’os ita nian, tamba 79% ne’e tama iha área Australia nian, maibé ita (Timor Leste) tama 21% deit, justru Australia mak sé hakarak lolos nia mak deside, tamba área Gretater Sunrice ne’e ninia (Australia, red) mak barak liu, tamba ne’e amk ita tenke halo negosiasaun uluk”, nia komenta.
Tuir Mericio Akara katak, Australia bele halo LNG ne’e namlele iha tasi laran deit mós sei la fó impaktu, tamba TL ho Australia hetan 50%-50%, tamba ne’e tuir Luta Hamutuk katak, Governu tenke kontinua deit prosesu ne’ebé mak iha, ne’e para Gastre Sunrice ne’e oinsa fahe no distribui.
“Governu atu bolu kompañia seluk mak hakarak dada Pipeline ne’e mai TL, maibé ema ne’ebé atu supa mina sai ne’e kompañia Woodside, agora ita halo kompañia seluk para ba dada mai, entaun ida ne’ebé supa sai ne’e nia lakohi karik”, nia pesemista.
Tamba ne’e Mericio Akara hateten katak, Sosiedade Sivil no povu tomak ejiji tenke dada mai TL, maibé oinsa nia negosiasaun entre TL ho Australia.
Tidak ada komentar:
Posting Komentar